Nunca antes na historia da humanidade tivemos máis acceso a información que agora. Nunca antes o noso coñecemento sobre o mundo no que vivimos e o seu funcionamento foi comparable ao que temos agora.
E con todo, como é posible que creamos firmemente en bulos e supersticións? Por que damos por boas e difundimos historias e noticias que nunca ocorreron? Que explica que, a pesar das evidencias, non esteamos dispostos a cambiar de opinión ou a modificala sequera?
As respostas a estas preguntas, como veremos no libro, teñen que ver con múltiples causas. Para empezar, analizaremos por que os seres humanos distamos moito de ser seres racionais. Entenderemos como procesamos a información dunha maneira que está lonxe de ser obxectiva porque, en definitiva, buscamos crer o que queremos crer. Examinaremos por que nosa memoria non é fiable e como elaboramos falsos recordos dunha maneira perfecta.

Unha viaxe apaixonante que nos axuda a comprender que case todo o que cremos sobre o mundo e sobre nós mesmos está mal.